3 Bedroom Retirement Unit For Sale in Mookgopong, BSH-RS00768

Details

EKSKLUSIEWE MANDAAT – Is jy op soek na stilte en ’n mooi uitsig? Hierdie 3-slaapkamer, 2-badkamer grasdakhuisie is net vir jou!

Hierdie unieke grasdakhuisie bied jou die perfekte kombinasie van gerief, natuur en gemeenskapslewe – ‘n ware juweel geleë in die gewilde Die Oog Aftree-oord. As jy op soek is na rus, ruimte en ‘n uitsig wat jou asem wegslaan, dan is hierdie eiendom jou volgende tuiste.

Wanneer jy deur die voordeur instap, word jy begroet deur 'n knus sitkamer met ‘n kamer aan jou regterkant wat as slaapkamer, kantoor of stokperdjie-kamer kan dien – perfek vir jou persoonlike behoeftes. Hierdie kamer maak dit moontlik om die huis aan te pas by jou lewenstyl – of dit nou werk van die huis af, kuns en handwerk, of ekstra slaapplek is. Die leefruimte vloei natuurlik na links, waar jy ‘n verrassend ruim kombuis aantref. Hier is meer as genoeg kaste en pakplek, ‘n ontbythoekie, ‘n gasstoof, en selfs plek vir ‘n dubbeldeur yskas – granietblaaie is nog ‘n positiewe byvoeging en genoeg ruimte vir enige kosliefhebber!

Die gastekamer is aan die linkerkant uit die kombuis, met die gastebadkamer net om die draai. Hierdie badkamer is toegerus met ‘n stort, wasbak, toilet én plek vir ‘n wasmasjien. Die hoofslaapkamer het ‘n volledige muur se ingeboude kaste, en ‘n en-suite badkamer met ‘n stort, wasbak en toilet vir maksimum privaatheid en gerief.

Die ware magie gebeur egter wanneer jy deur die glas skuifdeur na buite stap. Hier wag ‘n klein lapa met ‘n uitsig oor ‘n natuurlike dreineringskanaal vol inheemse plantegroei – wat jou laat voel asof jy in ‘n tropiese woud is. Die bos wemel met natuurlewe: apies, bokkies, voëls en nagdiertjies maak gereeld hul verskyning. Dis ‘n plek waar jy werklik kan asemhaal en die stilte indrink.

Hierdie eiendom is geleë in ‘n stil cul-de-sac, wat dit ekstra privaat en rustig maak – ‘n seldsame bonus. Boonop is daar wonderlike bure wat jy enige tyd van die dag of nag kan bel as daar ‘n krisis is – ‘n ware gemeenskap waar mense mekaar ondersteun en omgee.

Die huis beskik ook oor twee staalafdakke, ideaal vir 2 voertuie.

Die Oog bied meer as net ‘n huis – dit bied ‘n lewensstyl. Die oord beskik oor ‘n verswakte sorg-eenheid en ‘n gemeenskap wat leef volgens die leuse: “aktiewe veroudering”. Hier kan jy deelneem aan Pilates, water-aerobics, lyn-dansklasse, jukskei, putt-putt, voëlkykuitstappies, en natuurlik stap in die natuurreservaat op die perseel. Die warmwaterswembad is ‘n gunsteling, en die gemeenskapsgees is iets besonders – ‘n plek waar jy deel voel van iets groter, waar mense omgee en vriendskappe blom.

Dis tyd om jou voete uit te skop en die lewe te geniet. Jou nuwe huis wag op jou – kom beleef dit self!